Йæ сæйраг хæс уыд адæймаджы схъомыл кæнын

Университет

Абон Тыбылты А. номыл паддзахадон университеты ирон æвзаг æмæ литературæйы кафедрæйы хъæппæрисæй уагъд æрцыд мысæн изæр ирон æвзаджы кафедрæйы бындурæвæрæг, филологон зонæдты доктор, ирон æвзагмæ стыр хайбавæрд чи бахаста, уый, Бекъойты Димитр цытæн.

Абон Димитры райгуырдыл сæххæст сæдæ азы.

Мысæн изæрмæ æрбамбырд сты Димитрæн йæхи студенттæ — абоны ирон æвзаджы дæснытæ æмæ университеты студенттæ.

Изæр йæ раныхасæй байгом кодта ирон литературæйы кафедрæйы сæргълæууæг Плиты Гацыр.

Уый банысан кодта, зæгъгæ, абон ирон æвзаджы тыххæй цы дзырд цæуы, уый уыд Бекъойты Димитры рæстæджы дæр. Уый ирон æвзагыл ныффыста бирæ æрмæг. Зæгъгæ, Димитр уыд фидар принциптыл хæст. Уыд Стыр Фыдыбæстæйон хæсты архайæг. Гацыр банысан кодта Димитры æнæкæрон хайбавæрд канд ирон æвзаджы размæцыды нæ, фæлæ æмткæй Ирыстоны хъысмæты.

Бекъойты Димитры цард æмæ куысты тыххæй доклад бакаст профессор Медойты Боболка. Уый æрдзырдта Димитры ахуыры азтыл, стæй Фыдыбæстæйон хæсты рæстæджы йæ фыссæн сис ныууадзгæйæ, уый куыд райста хæцæнгарз æмæ куыд дæрæн кодта знаджы. Стыр хорзæхтимæ йæ райгуырæн бæстæмæ æрыздæхгæйæ. Тбилисмæ ацæугæйæ, уый сахуыр кодта аспирантурæйы æмæ ссис филологон зонæдты доктор. 22 азы разамынд кодта ирон æвзаг æмæ литературæйы кафедрæйæн. Хицæн рæстæджы куыста деканæй дæр. Кодта зонадон æмæ иртасæн куыстытæ. Йæ къухæй рацыд бирæ æвзонг фысджытæ, журналисттæ, æвзаджы дæснытæ.

Дарддæр изæры хайадисджытæ æрдзырдтой Бекъойты Димитры тыххæй сæ мысинæгтыл. Уыдонæй алчи дæр банысан кодта, Димитр кæй уыд æцæг патриот, рæстдзинады сæрыл тохгæнæг. Йæ сæйраг хæсыл нымадта адæймаджы схъомыл кæнын. Зæгъгæ, мах, йе студенттæ иууылдæр тынг уарзтам æмæ кад кодтам Димитрæн. Сæ ныхæстæй бæрæг уыд, куыд бирæ базыдтой уый къухты æмæ абон дæр кæй баззад сæ мысинæгты.

Уыимæ иумæ загътой, абоны бон Бекъойты Димитры сæр куыд тынг хъæуы Ирыстоны.

Уадз, Димитры рухс ном æнустæм цæрæт, стыр лæггæдтæ цы ирон адæмæн бакодта, уыдоны зæрдæты. Ирыстоны та фылдæрæй — фылдæр кæнæт ирон æвзаджы кад бæрзонд чи иса, ахæм адæймæгтæ.

Бæрæг куыд у афтæмæй, 15 — æм майы нæ республикæйы нысан цæудзæн ирон æвзаг æмæ литературæйы бонæй.

Комментирование и размещение ссылок запрещено.

Комментарии закрыты.

Яндекс.Метрика